دوابەدوایی ئازادبوونی چەندین ناوچەی رۆژئاوایی کوردستان و پێشرەویەکانی هێزە کوردیەکان(ی پ و ی پ ژ) و هێزەکانی سوریایی دێمۆکراتیک، دەوڵەتی تورکیا دەستی داوەتە بۆمبارانی ناوچە تازەئازادکراوەکان و بە هۆیی ئەو بۆمبارانە چەندین هاوڵاتی گیانیان لە دەست داوە و بە دەیان کەس بریندار بوون.
شکستی هێزە تێروریستیەکانی داعش، جبهەالنصرە و هتد بۆتە هۆیی تورەی و شڵەژانی تورکیا، کە لە سەرەتایی شەری ناوخۆیی سوریا پشتیوانیان لێ دەکات.
هێزەکانی داعش و جبهەالنصرە و باقی گروپەکانی سەر بە القاعیدە لە لایەن نەتەوەیەکگرتوەکان و هەموو جیهان بەگشتی وەک هێزی تیرۆر ناسێندراون و کورد و هاوپەیمانان شەر دژیان دەکەن، لە کاتێک دا دەوڵەتی تورکیا پەروەردەیان دەکا، سلاح و تەقەمەنیان دەداتێ، رێگایان بۆ دەکاتەوە و بەهەموو شێوەیێک هاوکاری و پشتیوانیان دەکات.
لە چەند رۆژی رابردوو و دوایی شکستی ئەو هێزە تێروریستانە، دەوڵەتی تورکیا بە ئاشکرا دەستی دایە پشتیوانی کردنیان و ناوچە کوردستانیەکان بۆمباران دەکات، ئەو ناوچانەی کە نێوان کانتۆناکانی عەفرین و کوبانی پێک دێنن.
هێزە کوردستانیەکان بە پشتیوانی هاوپەیمانان شەرێکی دژواریان دژی ئەو تێرۆریستانە کردوە و رۆژ بە رۆژ لە پێشکەوتن دان و تێرۆریستان ڕادەماڵن.
پێویستە نەتەوە یەکگرتوەکان و هێزی هاوپەیمانان گوشار بخەنە سەر تورکیا کە دەست لە پشتیوانی لە تێرۆریستان و ئاژاوەگێری هەڵگرێت،
نەتەوەیەکگرتوەکان و کوالیسیۆنی هاوپەیمانان دەبێ لە تورکیا پرسیار کەن، لە ماوەی رابردوو ئەو ناوچانە لە ژێر دەستی هێزە تێرۆریستیەکان دا بوون و بە سەدان خەڵک بوونەتە قوربانی، بەڵام ئێوە هیچ هەڵویستی دژی وانتان نەگرتە بەر و بگرە یارمەتیشتان دان، چۆنە کە ئێستا کە هێزە کوردیەکان کە پشتیوانی ئێمەیان هەیە دەگرنە بەر تۆپباران و هەرەشەیان لێ دەکەن.
نەتەوە یەکگرتوەکان و هێزەهاوپەیمانەکان پێویستە بە جدی و ئاشکرا هەڵوێستی تورکیا سەرکۆنە بکەن و ئیزنی نەدەن کە چی تر روژئاوایی کوردستان بخاتە ژێر هێرش و هەرەشە.
کۆمەڵەی مافی مرۆڤی کوردستان ئیدانەی هێرشەکانی دەوڵەتی تورکیا بۆ سەر رۆژئاوایی کوردستان دەکات و دوپاتی دەکاتەوە کە تورکیا بە ئاشکرا پشتیوانی هێزە تێرۆریستیەکانی داعش و جبهەالنصرە دەکات، بۆمبارانی هێزە کوردیەکان و هاوکات پشتیوانی تورکیا لە تێرۆریستان ئارامی رۆژئاوایی کوردستان و بەگشتی ئاسایش و ئەمنیەتی جیهانی دەخاتە مەترسیەوە.
بۆیە کۆمەڵەی مافی مرۆڤی کوردستان داوا لە نەتەوە یەکگرتوەکان و هێزی هاوپەیمانان دەکات، لێپرسینەوە لە تورکیا بکەن و واداری بکەن چیتر هێرش نەکاتە سەر رۆژئاوایی کوردستان.
کۆمەڵەی مافی مرۆڤی کوردستان
20160217
