KMMK:
ڕامین زەندنیا، مامۆستای پێشووی شاری سنە و چالاکوان و ئەندامی پێشووی دەستەی بەڕێوەبەری یەکێتی مامۆستایانی کوردستان، تەنانەت دوای کۆچ کردن بۆ تاراوگەیش لە لایەن دەزگا و ئەندامانی پەیوەست بە سیستمی ئیتلاعاتی کۆماری ئیسلامی ئێران لەژێر گوشاردایە.
لە چاوپێکەوتنێکدا کە پەیامنێری کۆمەڵەی مافی مرۆڤی کوردستان لەگەڵ ڕامین زەندنیا ئەنجامی داوە، ڕایگەیاندووە: “لە 20ی ئاداری 2020 دوای هێرش کردن ودزین و شکاندنی شیشە و لاشەی ئۆتۆمبێلەکەم لەکاتی سکاڵاکە دا لە پۆلیسی فیدراڵی ئەیالەتی NRW لە ئاڵمان، پۆلیس پێی وایە کە من لەلایەن کەسێک یان کەسانێکەوە کراومە ئامانج و دەبێت بە بەردەوامی لەگەڵ نوسینگەی پۆلیسی فیدڕاڵی لە پەیوەندی دا بم.
ناوبراو گوتی: “دوای ئەم ڕووداوە چەند جارێک ئەندامانی بنەماڵەکەم لە سنە لەلایەن دەزگای ئیتلاعاتی پاسدارانەوە بانگ کراون و لێپرسینەوەیان لەگەلکراوە و گوشاریان لەسەر کراوە کە دەبێت خۆم ڕادەستی دەزگای ئیتلاعاتی کۆماری ئیسلامی ئێران بکەمەوە.
ئەم چالاکە گوتیشی: هێزە ئەمنییەکان داوای ژمارە تەلەفۆن و ناونیشانی من لە ئەندامانی بنەماڵەکەم کردووە و هەڕەشەیان لێکردوون کە گوشارم بۆ بێنن بۆ گەڕانەوە بۆ ئێران و هەر وەها لە لایەن ئەم دەزگای ئیتلاعاتی ئێرانەوە چەندین دۆسیەی ئەمنی لە دژی من درووست کراوە و لە دژی من سکالایان تۆمار کردووە.
ڕامین زەندنیا چالاکوانی سیاسی و کەسایەتیی ناسراو و ئەندامی دەستەی بەڕێوەبەری یەکێتی مامۆستایانی کوردستانە و لە ساڵی 2015 بەهۆی گوشار و هەڕەشەکانی دەزگا ئەمنییەکانی کۆماری ئیسلامی ئێرانەوە ناچار بوو ئێران بەجێبهێڵێت و دوای ماوەیەک لە نشتەجێوونی لە هەرێمی کوردستان رووی لە تاراوگە کرد و داوای مافی پەنابەری لە ولاتی ئاڵمان کرد.
ع.س
