KMMK:
محه‌ممه‌د سدیق رۆسته‌می، چالاكوانی مه‌ده‌نی له شاری سنه، كه به تۆمه‌تی سوكایه‌تی به رێبه‌ری كۆماری ئیسلامی سزای زیندانی به‌سه‌ردا سه‌پێنراوه، له لایه‌ن لقی جێبه‌جێكردنی سزاكانه‌وه بۆ به‌سه‌ر بردنی ماوه‌ی زیندانه‌كه‌ی بانگهێشت كرا.
به‌پێی زانیاریه‌كان ئه‌و چالاكوانه مه‌ده‌نیه ئاگاداركراوه‌ته‌وه، كه رۆژی شه‌ممه ۲۲ ی پوشپه‌ڕی ۲۷۱۹ بۆ به‌سه‌ربردنی ماوه‌ی ۳ مانگ و یه‌ك رۆژ سزای زیندانی سه‌ردانی لقی جێبه‌جێ كردنی سزاكانی دادگای كۆماری ئیسلامی له سنه بكات.
رۆسته‌می له ۱۵ ی ره‌زبه‌ری ساڵی پار بانگهێشتنامه‌یه‌كی له لقی یه‌كی دادگای شۆڕشی سنه‌وه به‌ده‌ستگه‌یشتبوو، كه تێیدا هاتبوو به تۆمه‌تی سوكایه‌تی به رابه‌ری كۆماری ئیسلامی ئاماده‌ی دادگا بێت.
رۆژی شه‌ممه ۲۱ ی ره‌زبه‌ریش لقی یه‌كی دادگای شۆڕش سزای یه‌ك ساڵ زیندانی كردنی به‌سه‌ر ئه‌و چالاكوانه‌دا سه‌پاندبوو، دواتر له لایه‌ن لقی چواری دادگای پێداچوونه‌وه‌وه سزاكه‌ی بۆ ۳ مانگ و یه‌ك رۆژ كه‌مكرابوه‌وه.
كۆمه‌ڵه‌ی مافی مرۆڤی كوردستان
