بەپێی هەواڵی گەیشتوو بە کۆمەڵەی مافی مرۆڤی کوردستان، ڕۆژی پێنج شەممە ۱۱ی جۆزەردانی ۱۳۹٦ی هەتاوی، گیراوی سیاسی کورد “سامان نەسیـــم” بۆ دەرخستن و دیاریکردنی پێگەیشتنی تەمەنی عاقڵ لەکاتی کردنی تاوانی داسەپاو، بۆ دادگای شۆڕشی ورمێ گوازرایەوە و بە ئامادە بوونی دادوەر لەلایەن چەند پزیشکێکەوە پشکنینی بۆکرا.
سامان نەسیم، مێر منداڵی تاوانباری مەحکووم بە ئێعدام، لە ژووری ۱۲ی گرتووخانەی ناوەندی ورمێ ڕاگیراوە و ئەوە لەکاتێکدایە کە بەپێی دەرەنجامە پزیشکییەکان و پزیشکی یاسایی، لەکاتی کردنی تاوان و دەستبەسەر کردنی تەمەنی نەگەیشتبووە ۱٨ ساڵ. بەڵام هەتا ئێستا ئەنجامی لێکۆڵینەوەکان ڕانەگەیێندراوە.
ناوبراو لە دایکبووی ۲٦ی سەرماوەزی ۱۳۷۲ی هەتاوییە و لە خاکەلێوەی ۱۳۹۲ لەلایەن دادگای شۆڕشی کۆماری ئیسلامی ئێران لە شاری مهاباد بە تاوانی شەڕکردن لەگەڵ خودا و گەندەڵی سەر زەوی لە ڕێی هەڵگرتنی چەک و ئەندام بوون لە یەکێک لە هێزە کوردستانییەکان، بە ئێعدام سزا دراو ئەو حوکمەش لە دادگای باڵای ئێران پەسەند کرایەوە.
لەسەر ئەو بابەتە زۆربەی وڵاتان، کارناسان و هەواڵنێرانی دانراوی ڕێکخراوی نەتەوە یەکگرتووەکان بۆ مافەکانی مرۆڤ لە ئێران و هەروەها ڕێکخراوی بەخشینی نێودەوڵەتی و ڕێکخراوە مافی مرۆڤییەکان، داوای ڕاگرتنی حوکمی ئێعدامی سامان نەسیم بوون.
کۆمەڵەی مافی مرۆڤی کوردستان
