ک.م.م.ک:
کۆمەڵەی مافی مرۆڤی کوردستان بە بڵاوکردنەوەی ڕاپۆرتێک، ڕۆژی چوارشەممە ٣٠ی بانەمەڕی ٢٧٢٦ی کوردی، لەسێدارەدانی دوو بەندکراوی سیاسیی کوردی بە ناوەکانی “ڕامین زلە” و “کەریم مەعرووفپوور” لە بەندیخانەی ڕژێمی ئێران لە نەغەدە ڕاگەیاند؛ لەسێدارەدانێک کە بە گوتەی چالاکوانانی مافی مرۆڤ، لە کەشێکی ئەمنییەتی و لەژێر سێبەری تەمومژێکی بەربڵاوی کۆمەڵایەتی-قەزاییدا بەڕێوە چووە.
بەپێی ئەم ڕاپۆرتە، بەرپرسانی قەزایی کۆماری ئیسلامیی ئێران تۆمەتی ئەم دوو بەندکراوەیان بە «پێکهێنانی گرووپی دژبەری دەسەڵات»، «ڕاپەڕینی چەکدارانە» و «تێکدانی ئاسایشی وڵات» ناوبردووە. سەرەڕای ئەمەش، ڕێکخراوەکانی مافی مرۆڤ جەخت دەکەنەوە کە پرۆسەی دەستبەسەرکردن، لێکۆڵینەوە و ڕاگەییشتنی قەزایی بەم دۆسیەیە، لەگەڵ بێبەشکردنی تۆمەتباران لە مافە سەرەتایییەکانیان، گوشاری ئەمنییەتی و نەبوونی شەفافییەتدا بووە.
“ڕامین زلە”، خەڵکی شاری نەغەدە، پێشتر لەلایەن لقی یەکەمی دادگای شۆڕشی ئێران لە مەهاباد بە سەرۆکایەتیی دادوەر «سیامی»، بە تۆمەتی «بەغی» (یاخیبوونی چەکدارانە) سزای لەسێدارەدانی بەسەردا سەپێندرابوو. سزای لەسێدارەدانی ناوبراو ڕۆژی شەممە ١٥ی سەرماوەزی ٢٧٢٥ی کوردی پێی ڕاگەیەندرابوو.
سەرچاوەکانی مافی مرۆڤ دەڵێن تۆمەتی سەرەکیی ئاڕاستەکراو دژی ئەو، «ئەندامێتی لە یەکێک لە حیزبە کوردستانییەکان» بووە؛ تۆمەتێک کە چالاکوانانی مەدەنی وەک نموونەیەک لە «بەتاوان ناساندنی چالاکیی سیاسی» وەسفی دەکەن.
لهم دۆسیەیەدا، “کەریم مەعرووفپوور”یش لەگەڵ تۆمەتی ئەمنییەتی ڕووبەڕوو ببووەوە و بەرەبەیانی ئەمڕۆ هاوڕێ لەگەڵ ڕامین زلە لە بەندیخانەی ئێران لە نەغەدە لەسێدارەدرا. بە گوتەی چالاکوانانی مافی مرۆڤ، نزیکەی هیچ زانیارییەکی ڕوون لەسەر کاتی دەستبەسەرکردن، پرۆسەی لێکۆڵینەوە، دەستڕاگەییشتن بە پارێزەر، شێوازی بەڕێوەچوونی دادگا یان وردەکارییەکانی دۆسیەکەی بڵاو نەکراوەتەوە.
کۆمەڵەی مافی مرۆڤی کوردستان ڕایگەیاندووە کە نەبوونی زانیاریگەیاندنی فەرمی و بێبەشکردنی تۆمەتباران لە دەستڕاگەییشتنی کاریگەر بە مافەکانی دادگاییکردنی دادپەروەرانە، نیگەرانییەکانی سەبارەت بە پێشێلکردنی جیددیی مافەکانی مرۆڤ و بەکارهێنانی سزای لەسێدارەدان لە دۆسیە سیاسی و ئەمنییەتییەکاندا چڕتر کردووەتەوە.
ئەم ڕێکخراوەی مافی مرۆڤە هەروەها داوای وەڵامدەرەوەبوونی بەرپرسانی قەزایی کۆماری ئیسلامی، بڵاوکردنەوەی وردەکاریی تەواوی پرۆسەی دادگاییکردنەکە و ڕاگرتنی جێبەجێکردنی سزای لەسێدارەدانی دژی بەندکراوانی سیاسی کردووە
ق.ش
