ک.م.م.ک:
بەگوێرەی ئەو زانیارییانەی بە دەستی ناوەندی هەواڵی KMMK گەیشتووه، ژن‌ومێردێکی پەنابەری سیاسی بە ناوەکانی ئامانج (حوسێن) منبەری و شەوگار محەممەدیان، لە رێگای رۆشتنیان بۆ ئەوروپا، لەلایەن پۆلیسی سنووری یۆنان دەسبەسەرکراون و رادەستی تورکیا کراون، پاشان لە لایەن پۆلیسی تورکیاوه بۆ کەمپی دیپۆرتکردنەوە راگوێزراون و مەترسی بەزوویی دیپۆرتکردنەوەیان بۆ ئێران، زۆر لەسەرە.
جێی ئاماژەیه، ئەم ژن و مێردە پەنابەرە سیاسییە، بۆ جاری سێهەمە کە دەسبەسەر یان دیپۆرت دەکرێن و پێشتریش لە مانگی گوڵانی ٢٧٢٣ی کوردی، لە شاری مارماریس دەستبەسەر کرابوون و بۆ کەمپی دیپۆرتی مۆغلا راگوێز کرابوون، کە له ئەنجامی هەوڵ و بەدواداچوونی کۆمەڵەکانی مافی مرۆڤی کوردستان، دوای پێنج مانگ ئازاد کران، هەروەها لە مانگی ڕێبەندانی هەمان ساڵدا، ئامانج منبەری بۆ دووهەم جار دەستبەسەر و ڕادەستی کەمپی دیپۆرتکردنەوە کرا، کە دوای ماوەیەک ئازادیان کرد.
بە گوێرەی ئەو ڕاپۆرتە، بە هۆی گوشارەکانی ڕژیمی ئێران و هەڕەشەکانی حکوومەتی تورکیا، ئەم ژن و مێردە به ناچاری ڕوو لە ئەوروپا دەکەن، کە لە رێگادا، دیسان دەستبەسەر کراون و گواستراونەتەوە بۆ کەمپی دیپۆرتکردنەوە. له ئەگەری رادەست کردنی ئەم هاووڵاتییانە بە رژیمی ئێران، به هۆی بەشداربوونیان له خۆپیشاندانەکانی دژ به کوشتنی حکوومەتیی ژینا ئەمینی، بێ‌گومان لە لایەن دامودەزگا ئەمنییەکان و سیستەمی قەزایی ڕێژیمی ئێران، دەکەونە ژێر ئەشکەنجە و لێدانی هێزەکانی رژیم و هەروەها سزای قورس و نادادپەروەرانەیان بەسەردا دەسەپێندرێت.
کۆمەڵەی مافی مرۆڤی کوردستان بە پێویستی دەزانێت ئاگادارتان بکاتەوە، کە ئەگەر ئەو هاووڵاتیانە دیپۆرتی ئێران بکرێنەوە، بە هۆی پێشینەی چالاکییە سیاسییەکانیانەوە، ژیانیان لە مەترسیدایە و ئەگەری ئەوە هەیە کە لە لایەن سیستەمی قەزایی رژێمی ئێرانەوە، ڕووبەڕووی سزای قورسی وەک لە سێدارەدان و بەندکرانی درێژخایەن و هەتاهەتایی ببنەوە. هەروەها بە پشتبەستن بە ئەزموونی خۆمان له سەر شێوازی مامەڵەکردنی سیستەمە ئەمنییەکانی حکوومەتی ئێران، ئەو هاووڵاتییانە تووشی هەموو جۆرە ئەشکەنجەیەکی جەستەیی و دەروونی دەبنەوە. هەر بۆیه، لێرەوە داوا لە کۆمیسیۆنی مافی مرۆڤی نەتەوە یەکگرتووەکان، ڕێکخراوی لێبوردنی نێودەوڵەتی، ڕێکخراوەکانی پشتیوانی پەنابەرانی نەتەوە یەکگرتووەکان و چالاکانی مافی مرۆڤ دەکەین، کە ئیدانەی دەستبەسەرکردنی ئەو هاووڵاتییانە بکەن و داوا لە حکومەتی تورکیا بکەن کە ئەو پەنابەرانە ئازاد بکات. پێویستە حکومەتی تورکیا لە دەرئەنجامەکانی دیپۆرت‌کردنەوەی پەنابەرەکان بۆ ئێران، ئاگادار بکەنەوە.
کۆمەڵەی مافی مرۆڤی کوردستان
