ک.م.م.ک
بەپێی هەواڵی گەیشتوو بە ناوەندی هەواڵی ک.م.م.ک ڕۆژی شەممە ٩ی رێبەندانی ساڵی ٢٧٢٣ی کوردی، بەکرێگیراوانی ڕێژیمی ئێران به گواستنەوەی کامەران شێخه زیندانی ئایینی، بۆ ئەو بەندانەی کە لە ڕووی تەندروستی و ئاسوودەییەوە باروودۆخێکی شپرزەیان هەیه، ئازار و ئەشکەنجەی رەوانی دەخەنە سەر ناوبراو.
لە درێژەی ئەم ڕاپۆرتەدا، بە پێی وتەی سەرچاوەیەکی ئاگادار، ئەو بەرپرسەی زیندان بە ناوی فامیلی حەق‌شناس، وێڕای ئازار و سووکایەتی بە بەندکراوەکان ، کەلوپەلی زیندانییە ئێعدامکراوەکان، وەکوو یەخچاڵ و … تاڵان دەکات و بە مەبەستی فرۆشتنیان دەیانباتە دەرەوەی بەندیخانەکە.
شایانی باسە کامەران شێخە و ئەنوەر خزری و خەسرەو بەشارت، سێ زیندانی ئایینی کوردن، کە دوای کوشتنی چوار کەس لە هاوزیندانییەکانیان لەلایەن حکومەتەوە لە ماوەی ٣ مانگی ڕابردوودا، مەترسی لەسێدارەدانیان لەسەرە. ئەم سێ بەندکراوە، پێشتر لە دۆسیەیەکی هاوبەشدا لەگەڵ داود عەبدوڵڵاهی، فەرهاد سەلیمی، قاسم ئابەستە و ئەیوب کەریمی، به تۆمەتی “فساد فی الارض” لەلایەن دادگای باڵای ڕژێمی ئێرانەوە سزای کوشتن له ژێر ناوی ئێعدام، بە سەریاندا سەپێنراوه.
خ.ع
