دوو هاوڵاتی بانەیی بە دانانی بارمتە لە زیندان ئازاد کران

ک.م.م.ک:

یەکشەممە ١١ی گوڵانی ٢٧٢٢ی کوردی، بێهزاد پزیشکی و ڕەفیق پزیشکی، دوو هاوڵاتی دەستبەسەر کراوی خەڵکی بانە، بە شێوەی کاتی و بە دانانی بارمتە لە زیندانی حکوومەتی ئێران لە شاری سنە ئازاد کران.

بێهزاد و ڕەفیق پزیشکی بە بارمتەی ٨٠٠ملوێن تمەنی و بە شێوەی کاتی تا کۆتایی قۆناغەکانی دادگایی لە زیندان ئازاد کراون.

شیاوی باسە کە، ئەم دوو هاوڵاتییە بە هاریکاری حیزبێکی کوردی دژبەری حکوومەتی ئێران تۆمەتبار کراون و لە ماوەی دەستبەسەری لە دەستڕاگەیشتن بە پارێزەر بێبەری کراون.

ئەم دوو هاوڵاتییە ٢٠ی خەزەڵوەری ٢٧٢١ی کوردی، لە لایەن هێزە ئەمنییەکانی ئێرانەوە بە بێ نواندنی حوکمی قەزایی و بە کوتەک و لێدان دەستبەسەر کراون. هاوکات هێزە ئەمنییەکان دەستیان داوەیە پشکنینی ماڵی ئەم هاوڵاتیانە و هەندێ کەلووپەلی وەکوو لۆپ تۆپ و کامێرای وێنەهەڵگرتن و موبایل و چەندد پەڕتووکێکیان دەستبەسەردا گرتووە و لە گەڵ خۆیان بردوویانە.

ئەم هاوڵاتیانە ڕێکەوتی ٢٥ی ڕێبەندانی ساڵی پار پاش کۆتایی لێپرسینەوە لە گرتووخانەی ئیدارەی ئیتلاعاتی حکوومەتی ئێرانەوە بۆ زیندانی ناوەندی ئێران لە شاری سنە ڕاگوازراون.

ق.ش

Leave a Reply

%d bloggers like this: