ک.م.م.ک :
دووشەمە 25ی ڕێبەندانی 2721ی کوردی، نۆ کەس لە دەستبەسەرکراوانی بانە، بە ناوەکانی سەڵاح پزێشکی، رەفیق پزێشکی، بێهزاد پزێشکی، کەریم پزێشکی، ئەبو بەکر پزێشکی، ئەرسەلان پزێشکی، فەرزاد پزێشکی، جەمال موروڤەتی و سەعید ڕەشیدی لە گرتووخانە ئەمنیەتییەکانی کۆماری ئیسلامی ئێرانەوە گوازرانەوە بۆ زیندانی گشتی لە سنە.
جێی ئاماژەیە که، ئەو هاوڵاتیانه لە ڕێکەوتی 20ی خەزەڵوەری ئەمساڵ بەبێ فەرمانی دادوەری و بە بەکارهێنانی توندوتیژی زارەکی و جەستەیی لەلایەن هێزە ئەمنییەکانی ئێرانەوه دەستبەسەرکراون و بۆ لێپرسینەوە گوازرانەوە بۆ بنکەی دەستبەسەرکردنی ئاسایشی ئێران لە سنە.
جێگای ئاماژەیە، کە لەکاتی دەستبەسەرکردنی ئەو هاوڵاتیانەدا، ئەندامانی خێزانەکانیان تووشی لێدان و بێڕێزی هێزەئەمنیەکان بوونەوە.
هەروەها هێزە ئەمنییەکانی ئێران ماڵی ئەو نۆ هاوڵاتیەیان پشکنیون و کەلووپەلی تایبەتیان وەکوو لاپتۆپ، کامێرا، مۆبایل و کتێب یان لێ زەوتکردوون.
بەپێی راپۆرتەکە، ئەو نۆ هاوڵاتییە لە کاتی دەستبەسەرکردنیاندا لە مافی “پارێزەر و سەردانی بنەماڵەکان” بێبەر بوون.
تا کاتی داڕشتنی ئەم هەواڵە، لەسەر ئەو تۆمەتانەی ئاراستەی ناوبراوەکان کراون، هیچ زانیارییەک لە بەر دەستدا نییە.
ع. س
