kmmk:
۲۸ خەرمانانی ۱۳۹۷ی هەتاوی، پەسەندی سزای دادگەی سەرەتایی لە لایەن دادگەی پێداچونەوە، بە چالاکی مەدەنی کورد «ئەرسەلان بۆڕنا» راگەیەندرا.
بە پێی وتەی سەرچاوەیەکی ئاگادار: «ئەرسەلان بۆڕنا»، ئەمساڵ هاوکات لەگەڵ دامەزراندنی یەکەمین رۆژنامەی کوردی (دووی گوڵان) لە لایەن دادگەی شۆڕشی کۆماری ئیسلامی ئێران لە شاری مەهابات موحاکمە کرا و بە تۆمەتی ریکڵام دژ بە حکومتی کۆماری ئیسلامی ئێران لە رێگای نوسینی بابەتگەلێکەوە لە سەر «بەرگری لە مافی ژنان، روداوەکانی پەیوەندی دار بە عەفرینەوە، رفراندۆمی باشوری کوردستان و رەخنە گرتن لە حکومەت» بە یەک ساڵ بەند کردنی تەعزیری سزا درابو کە ئەم سزایە لە لایەن دادگەی پێداچونەوەی کۆماری ئیسلامی ئێران لە مەهاباد پەسەند کرایەوە و بە ناوبراو راگەیەندراوە.»
ئەم سەرچاوەیە لە درێژەدا دەڵێت: «ناوبراو چواری رەشەمێ ۹۶ لە لایەن ئیتلاعاتی کۆماری ئیسلامی ئێران لە شاری مەهابادەوە بانگهێشت کرابوو و دواتر دەست بەسەر دەکرێت و پاش پێنج رۆژ بە دانانی بارمتەی ۲۰ ملوێن تمەنی بە شێوەی کاتی و تا رۆژی دەر کردنی سزاکەی ئازاد دەکرێت.»
ئەرسەلان بۆڕنا سەرەتای مانگی رەزبەری ئەمساڵ بۆ بەسەر بردنی ماوەی سزاکەی دەبێت خۆی بناسێنێت بە زیندانی کۆماری ئیسلامی ئێران لە شاری مەهاباد.
جێگای ئاماژەیە: ناوبراو پێش دەست بەسەر کردن بە هۆی نوسینەکانیەوە چەندد جار لە لایەن ئیدارەی ئیتلاعات لە شاری مەهاباد بانگهێشت کرابو و خرابویە ژێر لێکۆڵینەوە.
کۆمەڵەی مافی مرۆڤی کوردستان
