ک.م.م.ک:
ڕۆژی یەکشەممە ١٢ی خەرمانانی ٢٧٢٣ی کوردی، چوار زیندانی بەناوەکانی وەحید چاوران، ناسر ڕەزایی و محەممەد حسەین ناسری خەڵکی ئاودانان و دوکتۆر بەختیار محەممەدزادە خەڵکی دەڕەشاری سەربە پارێزگای ئیلام لە دەستبەسەرکراوانی شۆڕشی ئازادی ژن بەبۆنەی نادیاربوونی چارەنووس و هەڵپەسێرانی دۆسیەکەیان لە گرتووخانە ئەمنییەکانی ڕێژیمی ئێران بە دروونەوەی لێوەکانیان، دەستیان دایە مانگرتن لە خوادن.
بەگوێرەی هەواڵەکە، دۆخی جەستەیی و دەروونی وەحید چاوران ناجێگیرە و کۆنتڕۆڵی بەسەر هەڵسوکەوتی خۆیدا نەماوە و ئەم زیندانیانە پتر بەو بۆنەیەوە مانیان لە خواردن گرتووە و دەکوترێ ناوبراو بەبۆنەی خواردنی ئەو حەبانەی ڕایەدارنی ئەمنییەتی پێیان داوە چووەتە ئەو حاڵەتەوە.
شیاوی باسە لەدوای بڵاوبوونەوەی ئەم دەنگۆیە کەشی شاری ئاودانان تێکچووە و کۆمەڵێک گەنجی خەباتکار ڕایان گەیاندووە لەبەرانبەر ئەم کردەوە دژە مرۆییەی حکوومەت دژکردەوە دەنوێنن.
ق.ش
