ک.م.م.ک:
بەپێی بەڵگەیەکی فەرمی کە کۆمەڵەی مافی مرۆڤی کوردستان دەستی کەوتووە، ئیدارەی چاودێری بەسەر شوێنی گشتییەکانی فەرماندەری ئینتزامی پارێزگای فارس لە ڕاگەیەندراوێکدا ناولێنانی کەسانێک بەناوی ژینا قەدەغە کردووە.
لەم ئاگادارکردنەوەی ئەم ئۆرگانەی کۆماری ئیسلامی ئێراندا هاتووە کە ئەم وشە و ناوە نائێرانییە، هەربۆیە بەکارهێنانی قەدەغەیە.
هەروەها لە دەقی ئەم ئاگادارکەرەوەدا ئاماژە بە کوردی بوونی ئەو ناوە کراوە و ڕاگەیەندراوە، قەدەغەی ناوی ژینا بەهۆی نائێرانی بوون و کوردی بوونی ئەم ناوەیە.
شیاوی باسە کە ئەو کچە گەنجە سەقزییە کەلە تاران لەلایەن هێزە چەکدارەکانەوە کوژرا لە ناسنامەکەی مەهسا نووسرابوو، بەڵام لە کوردستان، لە ماڵەوە و لە نێوان خزم و کەس و بنەماڵەکەی ناوی ژینا بوو. بنەماڵەکەی بەپێی ئەوەی مۆڵەتیان نەبوو کە ناوبراو بە ناوی کوردییەوە ناو بنێن، ناچار ببوون کە لە ناوێکی دیکە کەڵک وەربگرن.
حکوومەتەکانی ئێران لەماوەی ١٠٠ساڵی ڕابردوو، کەلتوور و زمانی کوردیان قەدەغە کردبوو و لەڕێی کەڵکوەرگرتنی تەواو لە ئاسانکارییەکانی دەوڵەتی و سەرکوتی تەواو بەمەبەستی ئاسمیلەکردنی زمان و کەلتووری نەتەوەی کورد دەسپێشخەرییان کردووە.
ق.ش
