ڕاپۆرتی پێشێلكاری مافی مرۆڤ له‌ مانگی مارسی ۲۰۱٨

ڕاپۆرتی پێشێلكاری مافی مرۆڤ له‌ مانگی مارسی ۲۰۱٨ کە بە هەوڵی کۆمەڵەی مافی مرۆڤی کوردستان و بە پشت بەستن بەو ڕاپۆرتانە کە لەلایەن كۆمه‌ڵه‌ی مافی مرۆڤی کوردستان بڵاوکراونەتەوە، کۆبەندی بۆکراوە. شایانی باسەئەم ڕاپۆرتانە، بەهۆی ئیزن نەدانی حکومەتی جمهوری ئیسلامی ئێران بەلێژنەکانی مافی مرۆڤی جیهانی، ڕاپۆرتێکی تەواو نییە وتەنیاوێنەیکی بچوکی لەژێر پێنانی مافی مرۆڤ لەڕۆژهەڵاتی کوردستان پێ نیشان دراوە.

کۆماری ئیسلامی ئێران بە گرتنی شارومەندانی کورد ، مافە سیاسی، کۆمەلایەتی و مەدەنیەکانی گەلی کورد پێشێل دەکات. ئازادی رادەربرین، مافی ژیانی ئازاد و سەربەخۆ، ئەمنیەتی تاکەکەسی، هەلاواردن، بێحورمەتی بە خەلك، بابەت گەلێکن کە کۆماری ئیسلامی ئێران بە رۆژانە پێشێلیان دەکات .هەروەها ئەشکەنجەی گیراوانی سیاسی و بەرچاونەگرتنی مافەکانیان بابەت گەلێکن کە لەو مانگەدا بەرچاو بوون.

بەپێی بڕگەی ۱۹ ی جاڕنامەی گەردونی مافی مرۆڤ هەر تاکێک مافی ئازادی ڕادەربڕینی هەیە هەروەهالەدێڕی یەکەمی بڕگەی ۹ بەشی نێونەتەوەیێ مافی مەدەنی وسیاسی داهاتوە؛ هەرکەسەومافی ئازادی وئەمنیەتی تاکەکەسی هەیە؛ هیچ کەسێک نابێت بەبۆنەی بیروباوەڕیەوەئازاربدرێتو سەرکوت بکرێت، لەبڕگەی دووی بەشی ۱۹ دادیسان دەڵێت؛ هەموو کەسسێک ئازادی ڕادەربڕینی هەیە، ئەومافانە ئەمانەلەخۆدەگرن، ئازادی گوتار ولێکۆڵینەوە و پەروەردەو بڵاوکردنەوەی زانیاری وبیروباوەڕ، هەر چەشن و جۆرێک بێ ئەوەی سنوری بۆدابنرێت جا ئیتر سەرزارەکی یا نوسراوە یان چاپی یابەشێوەی هونەری یا هەر چەشنێک کەمرۆڤ خۆی هەڵی بژێرێت.

هەروەهالە بڕگەی ۲۲ داداهاتوە هەرتاکێک وەکو کەسێک لەکۆمەڵگا مافی ئەمنیەتی کۆمەڵایەتی هەیە ولەڕێگەی تێکوشان لەپانتایی نەتەوەیی و هاوسۆزی نێو نەتوەیەوە بەڕێکخراوەیی کردنی سەرچاوەکانی هەر وڵاتێک، مافی لێ زەوت نەکراوی ئابوری، کۆمەڵایەتی و کلتوری خۆی بپارێزێت بۆ پەرە پێدانی ئازادانەی کەسایەتی تایبەتی خۆی بەدەست بێنێت؛ وهەروەهابەپێی بڕگەی ٥هیچ کەسێک نابێت ئەشکەنجە بدرێت یان سزابدرێت یان بەشێوەی نامرۆڤانەو دڕندانە وڕوخێنەرهەڵسوکەوتی لەگەڵ بکرێت. بەپێی بڵاوکراوەفەرمیەکانی جیهانی لەمەڕ مافی مرۆڤ و مافی سیاسی وکۆمەڵایەتی و کۆمەڵگای بەشەری، هەر تاک و کۆمەڵگایک مافی خۆیەتی داوای مافی سیاسی وکۆمەڵایەتی و ئابوری وکلتوری خۆی بکات وبۆ وەدەست هێنانی تێبکۆشێت، هیچ کومەڵێک یان گروپێک لەسەرو کەسی ترەوەنییەوهەمو کەسێک دەبێت لەمافی سروشتی بەفەرمی ناسراوی خۆێی بەهرەمەند بێت.

کۆمەلەی مافی مرۆڤی کوردستان هەموو مانگێک کۆکراوە و گوزارشێکی پوخت لە پێشێلکاریەکانی مافی مرۆڤی لە کوردستان دا بڵاو دەکاتەوە. لە گوزارشی ئەو مانگەش دا دەردەکەوێ کە رەوشی مافی مرۆڤ لە کوردستان خراپتر بووە و دەوڵەتی ئێران کردەوە دژە مرۆڤیەکانیان دژی گەلی رۆژهه‌ڵاتی کوردستان زیاتر کردوە.

لەو مانگەش دا، ئێعدام، گرتن و ئەشکەنجەدان، خەسارەکانی ژینگە و هتد زۆر بەرچاون و رەوشێکی مەترسیدار نیشان دەدەن کە له‌گەلی  کوردستان روبەرووی بۆتەوە.

گەنجێکی کورد بەناونیشانی “قوباد ئەعزەمی” خەڵکی جوانڕۆ لەڕۆژهەڵاتی کوردستان لەژێر ئەشکەنجەی گرتووخانەی ئیتلاعاتی ئەو شارە گیانی لەدەست دا.

دادگەی ئینقلابی کۆماری ئیسلامی ئێران لە ورمێ قەراری ۵ ساڵ بەندکردنی بۆ خوێندکارێکی کورد بە ناوی ” ئیبراهیم خالدی” خەڵکی سەردەشت دەر کرد.

دۆسیەی ڕامین حسێن پەنایی زیندانی سیاسی کورد نێردرا بۆ شاری قم.

یەکێک لە باوەڕمەندانی ئاینی یارسان بە ناوی “پەیمان پەدروود” لە ڕێکەوتی ٨ی رەزبەری ئەمساڵ پاش چونە دەرەوە لە ماڵ لە شاری کەرەج دەست بەسەر کراوە.

دوو کارگێڕی تێلێگرامی کاناڵەکانی ئامانج و ورمێ ۲ لە لایەن هێزە ئەمنیەتیەکانی کۆماری ئیسلامی ئێرانەوە دەست بەسەر کران.

پێنج شەممە ۱۷ ی رەشەمە، لاوێکی کورد بە ناوی “موحسێن ئەحمەدی” لە لایەن ئیدارەی ئیتلاعاتی  کۆماری ئیسلامی ئێران لە شاری مەهاباد بانگهێشت کراوە و هەڕەشەی قۆلبەست کردنی لێ کراوە. موحسێن ئەحمەدی تەمەن ۲۴ ساڵان وخەڵکی گوندی سەهۆڵانی مەهابادە.

دەستبەسەری چوار هاوڵاتی کورد لە ڕۆژهەڵاتی کوردستان.

 ۲١ی ڕەشەممەی ۱۳۹۶ی هەتاوی ۷ کەس لە چالاکانی مەدەنی کورد لەڕۆژهەڵاتی کوردستان بەهۆی چالاکی وبەشداری کردن لە گردبوونەوەی ناڕەزایەتی دژبە هێرش وپەلامارەکانی دەوڵەتی داگیرکەری تورکیا بۆسەر عەفرین لەلایەن هێزە ئەمنییەکانی کۆماری ئیسلامی ئێرانەوە دەست بەسەر کراون

۲۶ی ڕەشەممە، هێزەکانی وەزارەتی ئیتلاعاتی کۆماری ئیسلامی لەسنە (سنە) هاوڵاتییەکی کورد بەنام” عەزیز مەولودی” دەسبەسەر و گوازتیانەوە بۆ شوێنێکی نادیار.

لەدرێژەی دەسبەسەری هاوڵاتیانی کورد لەلایەن هێزە ئەمنییەکانی کۆماری ئیسلامی ئێرانەوە لەڕێکەوتی ۲۱ی ڕەشەممەی ئەمساڵ دوو کەسی دیکە بەناوەکانی “محەممەد نەدیمی” و ” عەلیڕەزا نەدیمی” لەڕۆژهەڵاتی کوردستان دەسبەسەر کراون

سەیدحسێن یوسفی بەندکراو لەزیندانی کۆماری ئیسلامی ئێران لەشاری مەهاباد کەلە ۸مانگی بەرێ وە بەتۆمەتی پڕوپاگەندە دژبە دەسەڵات لەڕێی چالاکی ئایینییەوە دەسبەسەرکراوە وبەهۆی نەخۆشی گورچیلەوە لەئازاردایە، سەرەڕای زانیاری بەرپرسانی زیندان لەهەمبەر دۆخی ئەم زیندانییە و داواکاری دەرمانی ناوبراو رەت دەکرێتەوە.

 هاوڵاتییەکی ژنی کورد بەناونیشانی ” شتاو فارووقی” لە رێکەوتی۳ی خاکەلێووەی لە زیندانی تەورێز گوازرایەوە بۆ زیندانی ناوەندی کۆماری ئیسلامی ئێران لەشاری سنە. جێگەی باسە کە ناوبراو بۆچاوپێکەوتنی کەسوکاری سەردانی تورکیای کردبوو وکەلەکاتی گەڕانەوە لەشاری تەورێز لەلایەن هێزەکانی ئێران گیراوە.

پێنج شەممە ڕێکەوتی دووی خاکەلێوەی ۱۳۹۷ی هەتاوی ۴ هاوڵاتی کوردی خەڵکی پەسوێ سەربە شاری پیرانشار لەڕۆژهەڵاتی کوردستان بانگهێشتی ئیدارەی ئیتلاعات کراون وهەر لەوێ دەسبەسەرکراون وتائێستە لەمەڕ چارەنووسی ئەم دەسبەسەر کراوانە زانیارییەک بەدەستەوە نییە.

چوارشەممە ئەحمەد ئەمین پەنا بە تۆمەتی بەڕێوە بردنی رێورەسمی جەژنی نەورۆز و پڕوپاگەندە دژ بە حکومەتی ئێران سزای پێنج ساڵ بەندیخانەی بەسەردا سەپێندرابوو و بە کەفالەتی ۱۵۰ ملیۆنی و بۆماوەی کاتی ئازاد کرابو لە لایەن هێزەکانی ئیدارەی ئیتلاعاتەوە قۆڵبەست کرا.

چوارمانگ بەسەر دەسبەسەری “تەحسین دادرسی”ناسراو بە تەحسین چاوشین کەلەلایەن دامەزراوە ئەمنییەکانەوە دەسبەسەرکرابوو تێپەڕیووە وسەرەڕای بەدواداچوونی بەردەوامی بنەماڵەکەی ،تائێستە لەچارەنووسی زانیارییەک بەدەستەوە نییە.

لەڕۆژانی نەورۆزی ئەمساڵ گەڵاڵەیەکان لەشاری کرماشان لەژێرناوی “گەڵاڵەی خاوێنکردنەوەی ئەوناوچانەی سەرچاوەی تاوانن” خستۆتە بواری جێبەجێ کردنەوە کەباس لە دەسبەسەری ۳۶۹ هاوڵاتی خەڵکی کرماشان دەکەن.

 رۆژی دوو شەممە ۲٨ی رەشەمەی ۱۳۹٦ی هەتاوی شارۆمەندێکی کورد بەناوی ” عیرفان ساعد پەنا” لە لایەن ئیدارەی ئیتلاعاتی کۆماری ئیسلامی لەشاری سنەوە بانگهێشت دەکڕێت و هۆکاری دەست بەسەر کردن و چارەنوسی ناوبراو تا ئەم کاتە نادیارە.

 ئەمیر پەیغامی بەندکراوی سیاسی کورد لە بەندیخانەی کۆماری ئیسلامی لە شاری ورمێ بە هۆی نەخۆشیەوە بارودۆخی جەستەیی نالەبارە و لەلایەن بەرپرسانی بەندیخانەوە رێگری لێ دەکرێت کە بۆ چارە سەری نەخۆشیەکەی بگواسترێتەوە بۆ نەخۆشخانە.

چوارشەممە ٩ی ڕەشەمەی ئەمساڵ، دوو کۆڵبەری کورد بەناوی «کاوە ڕەشیدی و فەرەیدوون» خەڵکی شاری بانە لەلایەن هێزە چەکدارەکانی بنکەی پاسەوانانی سنووری «نەنور»ەوە کرانە ئامانج و بە سەختی بریندار کران.

۱٤ی ڕەشەممەی ۱۳۹۶ی هەتاوی لەسنووری “گوندی بڕوێشکانی ــ نەنۆری “ی بانە(ناوبەری ڕۆژهەڵات وباشووری کوردستان) دوو کۆڵبەری کورد کەهەردووک برابوون بەناوەکانی “کامران ویادگار ئەمینی” بەهۆی کەوتن بەسەر مین دا ،بریندار بوون.

شەممە ۱۲ی رەشەمەی ئەمساڵ، تەرمی کۆڵبەرێکی ٦۰ ساڵان بە ناوی “خدر عەبدوڵاهی” دۆزرایەوە.

شەوی ۱٨ی ڕەشەمەی ۱۳۹٦ هەتاوی لە ناوچەی پیرانشار لە ڕۆژهەڵاتی کوردستان، هێزەچەکدارەکانی کۆماری ئیسلامی بۆسەێیک بۆ کۆڵبەرانی ئەودەڤەرە دەنێنەوە و دەیاندەنە بەر دەسڕێژی گولە.

دووشەممە ۲۱ رەشەمە، کۆڵبەرێکی کورد بەناوی ” ئەمیر شێخە ” لە بەرزاییە کانی سنوری سەردەشت دەکەوێتە خوارەوە و بریندار دەبێت.

دوو کرێکاری کورد بە ناوەکانی “سامان رەنجبەری” و “حەسەن کورد” بە هۆی تەقینەوەی هەڵمی کەرەستەی تاوناوی توشی سوتانی رێژەی ۷۰ تا ٨۰ لە سەدی دەبن و پاش تێپەڕینی ۳ رۆژ بە هۆی زۆری خەستی برینەکانیان لە نەخۆشخانە گیانیان لەدەست دەدەن.

سێ کۆڵبەری کورد بە دەستی هێزە ئەمنیەکانی کۆماری ئیسلامی ئێران یان بەهۆی هەڵدێران لە شاخ و بەرزایەکانەوە برینداربون.

۲۷ی ڕەشەممەی ئەمساڵ بەهۆی ڕاوەدونانی کۆڵبەرێکی کورد بەناونیشانی محەممەد خەڵکی گوندی(ئەسکۆڵ)ی مەریوان لەبەرزاییەکانی گەردەنەی”تەتە” کەوتە خوارەوە و بەگرانی بریندار بوو.

 ۳ی خاکەلێوەی ۱۳۹۷ی هەتاوی، مووچەی پاشەکەوتی سەرجەم مانگەکانی ڕەشەممە،ڕێبەندان، ڕەزبەر وخەزەڵوەر وزێدەکارییەکانی سەرماوەز و بەفرانباری ساڵی ڕابردووی کرێکارانی شارەوانی مەهاباد تائێستە پێیان نەدراوە.

۴ی خاکەلێوەی ۱۳۹۷ی هەتاوی، لەنێزیکی گوندی کانی زەردێی سەربەشاری سەردەشت لەڕۆژهەڵاتی کوردستان، کاروانێک لەکۆڵبەران لەلایەن هێزەکانی هەنگی سنوورییەوە کرانە ئامانجی تەقەی ڕاستەوخۆ کە بەو هۆیەوە کۆڵبەرێک بەناوی “لوقمان ئەحمەدزادە” ۳۷سالە گیانی لە دەست داوە.

۶ی خاکەلێوەی ۱۳۹۷ی هەتاوی کۆڵبەرێکی کورد بەناونیشانی “ئیبراهیم سلێمانی ” خەڵکی گوندی کانی زەرد سەربە شاری سەردەشت بەتەقەی ڕاستەوخۆی هێزە چەکدارەکانی کۆماری ئیسلامی ئێران کوژرا. جێگەی باسە ناوبراو خێزان دار وخاوەنی ۴کچ وکوڕێک بووە وتەنیا کاسبکاری ماڵەوە بوو .

دووشەممە ۶ی خاکەلێووەی ئەمساڵ، وەرزێرێکی کورد،خەڵکی شاری سنە لەکاتی جێبەجێ کردنی کار لەگوندی (سی وسێ مەردە)ی سەربە “بەڵەسێ”ی شاری دێولان لەکاتی کێڵانی زەوی کشتوکاڵی، بەهۆی هەڵدێرانی تراکتۆرەکەی گیانی لەدەست دا.

چوارشەممە ۸ی خاکەلێووەی ئەم ساڵ، یەکێک لە (سیمبان)گەلی کومپانیای “اروم نوآورن غرب”له ورمێ، کەبەمەبەستی چاک کردنی ئەو گڵۆپانەی لەسەر ڕێگەی هاتووچۆی خەڵک کەلەپاش گەردەلوولی ئەم دوایانە تووشی خەسار ببوون، ئەم سیمبانە ڕوومەتی خەساری پێگەیوپێ وسووتا وهەنووکە لەنەخۆشخانەیە.

 کۆڵبەرێکی کورد بەناونیشانی سامان سەبری لەسنووری بانە بووبە ئامانجی تەقەی هێزە چەکدارەکان. ئەم گەنجە ۲۳ساڵ تەمە لەسنووری بانە سەرقاڵی کۆڵبەری بووە کە لەلایەن هێزەکانی هەنگی سنووری کۆماری ئیسلامی ئێرانەوە کرابە ئامانج ۆبەگرانی برینداربووە.

شەمە ۱۲ی ڕەشەمەی ۱۳۹٦ی هەتاوی ژنێک بەناوی ” نەدا زاهیری عەبدە وەند ” کچی حەسەنعەلی لە شاری کامێران سەربە پارێزگای سنە خۆی کوشتوە . لە هەواڵەکەدا هاتوە ئەو ژنە خێزاندار خاوەنی ۲ منداڵ بوە و بە هۆی کێشەێیکی بنەماڵەییەوە هەوڵی خۆکوژی داوە و گیانی لە دەست داوە .

۱۴ی ڕەشەمە ی ۱۳۹٦ی  لە گەڕەکی ئازادەکانی شارستانی دیواندەرە لە پارێزگای سنەی ڕۆژهەڵاتی کوردستان ،هاووڵاتێیک بە ناوی سدیق شابازی تەمەن ٥۰ ساڵ بە هۆکارێکی نادیار دەستی داوەتە خۆکوژی و گیانی لە دەست داوە .

پێنج شەممە ۱۷ی رەشەممەی ئەمساڵ زۆرانبازێکی کورد خەڵکی شاری “سەحنە” لە پارێزگای کرماشان بە ناوی “ئەمین رەزایی” بە شێوەی خۆهەڵواسین کۆتایی بە ژیانی خۆی هێنا.

شەممە ۱۹ی ڕەشەممە مامۆستایەکی قوتابخانەی خەڵکی سەرپێڵ زەهاو بەناونیشانی “ڕەسوڵ قارەمانی” ۳١ ساڵ تەمەن لەناوچەی تازئاوا لە کامپی نێزیک بەئیدارەی پەروەردە و فێرکاری، خۆی سێدارەی بۆخۆی هەڵواسی وکۆتایی بەژیانی خۆی هێنا.

 ۹ خاکە لێوەی ۱۳۹۷ی هەتاوی لە شاری کامێران سەر بە پارێزگای سنە  گەنجێکی ۲٤ ساڵ تەمەن بە ناوی “ئیدریس کەمانگەر ” کە خێزاندار بوە، خۆکوژی کردوە و گیانی لە دەست داوە.

۳ی خاکەلێووەی ساڵی ۱۳۹۷ی هەتاوی، پیاوێکی گەنج بەناونیشانی “میلاد خوجەستە” کوڕی حسێن بەهۆکارگەلی نادیار دەستی دایە خۆکوژی وگیانی خۆی لەدەستدا.

یەکشەممە ۲۰ی ڕەشەممەی ساڵی ۱۳۹۶ی هەتاوی ،ئیمامی جەماعەتی شاری کرماشان خوازیاری ڕووبەڕووبوونەوە لەگەڵ کەسانێک بووە کەلەفستیواڵی خێڵ وئێلەکان بەشێوەی تێکەڵاوی هەڵپەڕکێی کوردیان کردووە.

هێرشی هێزەکانی چەکداری کۆماری ئیسلامی بۆسەر گوندی نێی مەریوان

 سێ شەممە ۷ی خاکەلێوەی ئەمساڵ  شارەوانی شاری سنە بە یارمەتی هێزە ئەمنیەکانی کۆماری ئیسلامی ئێران  هێرش دەکەنە سەر دۆڵی “سەی حسەین” و ماڵی هاووڵاتیەک دەڕوخێنن. بە پێی وتەی سەرچاوەیەکی ئاگادار،دۆڵی سەید حسەین گەڕەکێکی هەژار نشینی شاری سنەیە و بێ بەرین لە خزمەتگوزاری.

۴ی خاکەلێوەی ۱۳۹۷ی هەتاوی ڕێژەیەکی بەرچاو لە خێوەت وکانێکسەکانی بولەرزە بەرکەوتوانی شاری سەرپێڵ زەهاو لەڕۆژهەڵاتی کوردستان بەهۆی ناستانداربووانی جێگیرکردنی ئەم خەساربەرکەوتوانە لەئاگردا سوتاو خەساری گەورەی لێکەوتەوە.

۱۹ی رەشەمەی ۱۳۹٦ی هەتاوی بە هۆی تەقینەوەی مین لە پێگەیەکی سنوری “هەرمێدۆڵی “شاری سەقز لە رۆژهەڵاتی کوردستان سەربازێک بە ناس ناوی “موحەمەد حەیدەری” خەڵکی شاری زەنجان بە خەستی بریندار بوو

یەک شەممە ۲۰ی رەشەمە، ئامێرێکی جۆری تراکتۆر لە کاتی کاروباری دانانی بۆری, مینێکی بەجێماو لە شەڕی ئێران و عێراق دەتەقێتەوە و شۆفیری تراکتۆرەکە توشی شۆکی شەپۆل بووە.

 هەینی ۳ی خاکەلێوە لە سەرئاوڵەی سەر بە پارێزگای ئیلام تەقینەوەی هاوەن بوە هۆی گیان لە دەست دانی دوئەندامی بنەماڵەیەک بە ناوەکانی “شوکروڵا رەحیمی ” و ” عەلی رەزا رەحیمی” کوڕی شوکروڵا و هەر بەو هۆیەوە دایکی بنەماڵەکە بریندار دەبێت.

 ۳ی خاکەلێوەی ۱۳۹۷ی هەتاوی، شارۆمەندێکی کورد بە ناوی “مەنسور مورادی” دانیشتوی گوندی ئیسحاق ئاوا ی سەر بە شاری سەقز لە رۆژهەڵاتی کوردستان بە هۆی تەقینەوەی مین هەردوو لاقی خۆی لەدەست داوە.

هەینی ۲ی مارس ۲۰۱۸ ، سوپای تورکیا هەڵیکوتایە سەر گوندی ڕەشای سەبریی سەر بە ئەرزرۆم و بەو بەهانەیەی گەریلای هەپەگەی لێیە ماڵەکانی سووتاند، لە ئەنجامدا چوار هاوڵاتی گیانیان لە دەستدا و هەشت هاووڵاتیشیان دەسبەسەر کردوە.

پێنجشەممە ۱٥ی ئادار لە پاریسی پایتەختی فەڕەنسا، دادگای هەمیشەیی خەڵک، لە پای ئەو تاوانانەی بەرامبەر گەلی کورد ئەنجامیان داون، یەکەم دانیشتنی خۆی بۆ دادگاییکردنی سەرانی ڕژێمی تورکیا دەستپێکرد.

 لە یەکەمین ڕۆژی نەورۆز  دەیان شارومەندی کورد لە شارەکانی باکوری کوردستان و تورکیا لە کاتی بەڕێوەبردنی بۆنە و جەژنی ” نەورۆز” لە لایەن پۆلیسی تورکیاوە قۆڵبەست کران. بە پێ چەند ڕاپۆرتێک پۆلیسی تورکیا لە کاتی بەڕێوەچونی ئاهەنگی نەورۆز 22 کەسی لە شاری ئیستەنبوڵ و 26 کەس لە باکووری کوردستان دەست بەسەر کراون.

لە عەفرین کۆمەڵکوژی روو دەدات/ زیاتر لە ۵۰۰ کەس گیانیان لەدەست داوە بە سەدانیش بریندارن.

 شەوی سێشه‌مه‌ له‌ سه‌ر چوارشه‌ممە ۱۵ له‌ سه‌ر ۱۶ی ڕه‌شه‌مه‌ی ۱۳۹۶، لە بۆسەیەکی تیرۆریستی دا لە ناوچەی ڕانیە، قادر قادری ئەندامی دێرینی حیزبی دیمۆکراتی کوردستان کەوتە بەر دەسترێژی گولە و لە ئاکامدا گیانی بەختکرد.

سەباح رەحمانی یەکێک لە ئەندامانی حیزبی دێموکراتی کوردستانی ئێران کە لە رۆژی پێنج شەممە ۱۰ی رەشەمە بە هۆی تەقینەوەی بۆمب لە گەڵ باوکی بە توندی بریندار کرابو، سەرلە بەیانی هەینی ۱۱ی رەشەممە لە یەکێک لە نەخۆشخانەکانی شاری هەولێر گیانی لە دەست دا.

۱۰ی ڕەشەمەی ۱۳۹٦ی هەتاوی لە شاری هەولێر پایتەختی هەرێمی باشوری کوردستان ، لە ئەنجامی تەقینەوەی بۆمبێکی چێنراو لە ژێر ئوتومبیلی دوو هاووڵاتی شاری کامێران و دانیشتوی شاری هەولێر سەلاح ڕەحمانی و سەباح ڕەحمانی بریندار دەبن.