بەپێی هەواڵی گەیشتوو بە کۆمەڵەی مافی مرۆڤی کوردستان، ڕۆژی هەینی ۲۳ی پووشپەڕی ۱۳۹٦ی هەتاوی، کۆمەڵێک لە چالاکانی سڤیل و ژینگەپارێز و خەڵکی ناوچەکە، بە مەبەستی پاڵپشتی کردن و ڕاکێشانی سەرنجی بەرپرسان و ڕێکخراوە پەیوەندیدارەکانی حکوومی و ناحکوومی، نێوخۆیی و نێودەوڵەتی لەسەر باروودۆخی گۆلی ورمێ و هەروەها دەربڕینی ناڕەزایەتی لە بێ پلانی بۆ بووژاندنەوە و چارەسەرکردنی ئەو کارەساتە ژینگەییە، زنجیرەیەکی مرۆڤییان لە ورمێ ڕێکخست و ڕاگەیێندراوێکیان خوێندەوە.
زانراوە کە هێزە ئەمنییەکان لەسەر ئەو چالاکییە هێرشیان کردە سەر چالاکوانان و کەسێکیان دەستبەسەر کرد و ڕەوانەی شوێنێکی نادیاریان کردووە.
سەرچاوەکانی هەواڵ نێوی ئەو چالاکوانە دەستبەسەر کراوەیان “موحەممەد حوسێن زادە” ڕاگەیاندووە.
شایانی باسە کە گۆلی ورمێ لە ڕۆژهەڵاتی کوردستان، گەورەترین گۆلی ئاوی سوێری جیهانە و سەرەڕای بوونی سەرچاوەی ئاوی پێویست، لەبەر بێ پلانی و سازکردنی پردێکی پەڕینەوەی ناستاندارد و بەبێ لێکۆڵینەوە لە دەرهاویشتە نەرێنییەکانی کە شارەکانی ورمێ و تەورێز بەیەکەوە دەبەستێتەوە، لەماوەی ۱۰ ساڵی ڕابردوودا زیاتر لە ۷٥%ی ئاوەکەی خۆی لەدەستداوە و مەترسی ویشک بوون و کارەساتی خوێ بارینی لێدەکرێت کە لە ئەگەری وەها ڕووداوێک، ژیانی ملیۆنان کەس دەخاتە مەترسییەوە.
کۆمەڵەی مافی مرۆڤی کوردستان
