کۆماری ئیسلامی ئێران سنوورەکانی نێوان ڕۆژهەڵات و باشووری کوردستان تۆپباران دەکات

بەپێی هەواڵی گەیشتوو بەکۆمەڵەی مافی مرۆڤی کوردستان، سەر لە بەیانی ئەوڕۆ دووشەممە ۳ی ژوییەی ۲۰۱۷ی زایینی، تۆپخانەکانی کۆماری ئیسلامی ئێران، بناری هەڵگوردیان لە دەڤەری سۆران و نیزیک سنووری حاجی ئۆمەران تۆپباران کردووە.

بەپێی سەرچاوەکانی هەواڵ، لە ئەنجامی ئەو تۆپبارانەدا ژنێکی کۆچەر بریندار بووە و زیانێکی زۆر بە ڕەز و باخی ئەو هەرێمە گەیشتووە و هەروەها زیاتر لە ۱٦ سەر لە مەڕ و ماڵاتی خەڵکی گووندی کونەڕێ لە بناری هەڵگورد لە ناوچوون. شایانی باسە کە دەوڵەتی ئێران، هەموو ساڵێ لەکاتی پێگەیشتنی بەروبوومی خەڵکی ئەو ناوچانە بە بیانووی بێ بنەما دەست بە تۆپباران کردنی خاکی هەرێمی کوردستان دەکات.

خاکی باشووری کوردستان هەمیشە بۆتە جێی پەلاماری تۆپخانەکانی کۆماری ئیسلامی ئێران و بۆردوومانی فڕۆکە شەڕکەرەکانی سووپای تورکیا و هەر ئەوەش بووەتە هۆی خەسارمەندبوونی خەڵکانی دانیشتووی ئەو سنوورانە و هەتا ئێستا دەیان کەسی سڤیل بوونەتە قوربانی دەستدرێژییەکانی ئەو ۲ دەوڵەتە.

کۆمەڵەی مافی مرۆڤی کوردستان

%d bloggers like this: