بەپێی هەواڵی گەیشتوو بە کۆمەڵەی مافی مرۆڤی کوردستان، ڕۆژی هەینی ۱۷ی ماڕسی ۲۰۱۷ی زایینی، هێزەکانی تورکیا، منداڵێکی ۱۷ ساڵانەیان لەسەر سنووری نێوان باکوور و باشووری کوردستان بە تەقەی ڕاستەوخۆ کوشت.
سەرچاوەیەک پێی ڕاگەیاندین کە منداڵێکی ۱۷ ساڵانەی کورد کە خەڵکی ڕۆژاوای کوردستانە و پێشتر بۆ سەردانی خزمەکانی چوبووە باکووری کوردستان، لە کاتی گەڕانەوەی بۆ ڕۆژاوای کوردستان، لە ناوچەی سنووری «مابەیا» و لە نزیک ئاوایی «ئێکەدامی» سەربە کانتۆنی عەفرین، کەوتۆتە بەر دەستڕێژی گوللەی ئەرتەشی تورکیا و دەستبەجێ گیانی لەدەست داوە.
هەمان سەرچاوە ڕایگەیاند کە هێزەکانی تورکیا، تەرمی ئەو منداڵەیان لەگەڵ خۆیان بردووە.
شایانی باسە کە دەوڵەتی تورکیا، هیچ کاتێک لە کوشتنی خەڵکی کورد خۆی نەپاراستووە و زیاتر لە ۱۰۰ ساڵە گەلی کورد، قوربانی سەرەکی دەستهەڵاتدارە یەک لەدوای یەکەکانی تورکیان.
کۆمەڵەی مافی مرۆڤی کوردستان
