ک.م.م.ک:
سێشەممە ٢٨ی خەرمانانی ٢٧٢٣ی کوردی، هێزە ئەمنییەکانی ڕێژیمی ئێران لە سنە هەڵیانکوتایە سەرماڵی خەبات و ڕامیار دێهدار و بە تەرزی توندئاژۆیانە ناوبراوانیان دەستبەسەر و بۆ شوێنێکی نادیار ڕاگواست.
بەگوێرەی هەواڵەکە، هێزە ئەمنییەکان لە کاتی دەستبەسەری سووکایەتیان بەبنەماڵەی ئەم دوو هاوڵاتییە کرد و موبایلی ئەم دوو کەسەشیان دەستبەسەردا گرت و لەگەڵ خۆیان بردیانن.
شیاوی باسە کە، خەبات دێهدار چالاکی کرێکاری شاری سنە ساڵی ڕابردوو لەڕەوتی شۆڕشی گشتگیر لە ٢٨ی ڕەزبەر دەستبەسەر و ٧ی خەزەڵوەر بەدانانی بارمتە بە شێوەی کاتی ئازاد کرابوو.
جێی سەرنجە کە، دەستبەسەری ئەم هاوڵاتیانە بەبێ نواندنی حوکمی قەزایی بووە و هیچ زانیارییەک لەمەڕ چارەنووسیشیان نییە بەدەستەوە.
ق.ش
