بۆ رای گشتی: خاوەندارییەتی لە رۆژئاوای کوردستان خاوەندارییەتی لە مرۆڤایەتییە

‌KMMK:
کۆمەڵەی مافی مرۆڤی کوردستان وێرای ئیدانە کردنی هەر چەشنە هێرشێکی تورکیا بۆ سەر رۆژئاوای کوردستان، داوا لە گەلی کوردستان و هەموو جیهان دەکات، بەر بەو هێرشە بگرن. هاوکات نەتەوە یەکگرتووەکان، یەکێتی ئەوروپا، وڵاتانی هاوپەیمان دژ بە داعش و لەسەرەوەی هەموویان ئەمریکا، فەرانسە و ئاڵمانیا وەک تاوانبار دەناسێت، لە ئەگەری هەر هێرشێکی حکومەتی تورکیا بۆ ئەو بەشەی کوردستان.
حکومەتی تورکیا لەسەرەتای ساز بوونی رۆژئاوای کوردستان، هەوڵی هێرش کردنی داوە. بە کشانەوەی هێزەکانی هاوپەیمانیی نێودەوڵەتی لەسەر سنوورەکان وا دەرئەکەوێ کە هێزەکانی هاوپەیمانیی، ئەمریکا، نەتەوە یەکگرتووەکان و یەکێتی ئەورووپا هاوربیری تورکیان بۆ هێرش کردنە سەر رۆژئاوای کوردستان.
حکومەتی رۆژئاوای کوردستان تا ئێستا هیچ هەڕەشەیەکی لە تورکیا نەکردووە. بەڵام دەوڵەتی تورکیا هەر لە سەرەتای شۆڕشی سوریاوە دوژمنایەتی ئەو خۆبەڕێوەبەرێتییە ئەکات. دەوڵەتی تورکیا دژی هەموو دەستکەوتەکانی گەلی کوردستانە. لەهەر شوێنێکی جیهان بێت، تورکیا ئەیەوێ دەستکەوتەکانی کوردان لەناو ببات.
کشانەوەی هێزە هاوپەیمانەکان لەسەر سنوور، رێ لەبەردەم هێرشی توکیا دەکاتەوە. ئەم هەڵوێستەی ئێستای هێزە هاوپەیمانەکان لەگەل پەیوەندی هاوپەیمانیی و رێسا جیهانیەکانی مافی مرۆڤ، پێوەندییە نێودەوڵەتیەکان و یاسای سەروەری وڵاتان یەکناگرێتەوە. سەرەتا هێزە هاوپەیمانەکان و هەموو هێزە جیهانییەکان، نابێ لەبەرامبەر ئەم هێرشەی تورکیادا بێدەنگ و تەماشاکەر بن.
بۆ کۆمەڵەی مافی مرۆڤی کوردستان داگیرکاری و پەرەپێدانی تێروریسم لە لایەن تورکیا ئاشکرایە و ئەو حکومەتە بە چەندین جار تاوانی دژی مرۆڤایەتی ئەنجام داواە، بەڵام ئەوەی کە نەتەوە یەکگرتووەکان، یەکێتی ئەوروپا، ئەمریکا، فەرانسە، ئاڵمان و هاوپەیمانی دژ بە داعش لەهەمبەر ئەو هێرشە شۆڤینیەی تورکیا بێدەنگە و رێگای بۆ دەکەنەوە، بە هیچ شێوەیەک قبووڵ ناکرێت و رێک بە مانای هاوپەیمانی و بەشداری لە تاوانەکانی حکومەتی تورکیایە.
لە کۆتاییدا داوا لە کوردستانیان و تەواوی ئازادیخوازان دەکەین، تێکۆشانیان بۆ پێشگرتن لە هێرشی تورکیا بۆ سەر رۆژئاوای کوردستان رێک بخەن و لە هەمبەر ئەو تاوانەی حکومەتی تورکیا بێدەنگ نەبن.
کۆمەڵەی مافی مرۆڤی کوردستان

%d bloggers like this: