رێخراوی نەتەوەیەکگرتووەکان دەبێت ڕێگری بکات لە ئەگەری هەر هێرشێکی تورکیە بۆ سەر رۆژئاوای کوردستان

KMMK:

کۆمەڵەی مافی مرۆڤی کوردستان، وێڕای ئەوەی کە هەر جۆرە هێرشێکی سەربازی دەوڵەتی تورکیە بۆ سەر رۆژئاوای بەتوندی ئیدانە دەکات، ئەوەش بە کردەوەیەکی داگیرکارانەو داسەپێنەرانە دادەنێت و مسۆگەر کردنی ئاشتی و ئەشتەوایی لەم هەرێمە بە ئەرکی رێخراوی نەتەوەیەکگرتووەکان و وڵاتانی هاوپەیمان لەشەڕی دژی داعش دەزانێت.

خۆبەڕێوەبەری رۆژئاوای کوردستان بە درێژایی چەندین ساڵ شەڕی ناوخۆی سوریە توانیویەتی بە باشترین شێوە ناوچەی باکووری سوریە و رۆژئاوای کوردستان بپارێزێت و بەڕێوەی بەرێت و هێزە ترۆریستەکانی سەربە تورکیەیان لەم ناوچە وەدەربنێ و بە هێزی سەربازی خۆیان توانیویانە هێزی داعش دوچاری شکست بکەن و رێگریان کردووە لە شەڕ و ئاژاوە لەناوچەکانی ژێر دەسەڵاتی خۆبەڕێوەبەریەکەیان.

کۆمەڵگای جیهانی، رێخراوی نەتەوە یەکگرتووەکان و وڵاتانی هاوپەیمان لە شەڕی دژی داعش، دەبێت هەستن بە ئەرکی خۆیان بۆ پاراستن و بونیاد نانی ئاشتی و ئارامی لەم ناوچە خۆبەڕێوەباریەدا.

هەرجۆرە هێرشێکی دەوڵەتی تورکیە بۆ ئەم هەرێمە بە توندی ئیدانە دەکرێت و بێ گومان دەچێتە خانەی داگیرکاری و پاڵپشتی ئاشکرای تیرۆریزم، بۆیە پێویستە رێخراوی نەتەوەیەکگرتووەکانو بەتایبەت وڵاتانی هاوپەیمانی شەڕی دژی داعش ب دەستپێشخەری ئامریکا بە جدی هەستن بە پراتیک کردنی ئەم ئەرکەیان.

کۆمەڵەی مافی مرۆڤی کوردستان، تەنها رێگای چارەسەری بۆ بەرگری لە هێرشی داگیرکارانەی تورکیە بۆ سەر رۆژئاوای کوردستان و هەڵگیرسانی شەڕێکی بەربڵاو لە ناوچەکەو نائارامترکردنی هەرێمەکە، بە فەرمیەت ناسینی خۆبەڕێوەبەری رۆژئاوای کوردستان لەلایەن وڵاتانی هێز هاوپەیمانەکان لەشەڕی دژی داعش و رێخراوی نەتەوە یەکگرتووەکان دەزانێت.

کۆمەڵگای جیهانی و ڕێخراوی نەتەوە یەکگرتووەکان هەمبەر بە داگیرکاری دەوڵەتی تورکیە بۆ سەر کانتۆنی عەفرین بێ دەنگ بوون و هەر ئەو بێ دەنگیە بووبە سەبەب ئەوەی تورکیە لەو ناوچە رەشە کوژییەکی بەرچاو بکات و لەو رووداوەدا سەرەڕای کوژرانێکی سەدان کەسی بە هەزاران هاووڵاتی ئاوارە بوون.
ئەگەر رێخراوی نەتەوە یەکگرتووەکان بەجدی ئەرکی خۆی سەبارەت بەم دۆخە بەجێ نەهێنێ ئەوا تورکیە زۆر دڕندانەتر لە پێش هەوڵی هێرشی سربازی بۆ سەر هەموو ناوچەکانی رۆژئاوای کوردستان دەدات.

لە کۆتایی دا بە لەبەر چاوگرتنی ئەم خاڵانەی سەرەوە، کۆمەڵەی مافی مرۆڤی کوردستان
لە ڕێخراوی نەتەوە یەکگرتووەکان، وڵاتانی هاوپەیمانی شەڕی دژ داعش، ئامریکا و یەکیەتی ئورووپا داوا دەکات بە هەڵوێستێکی کرداری رێگری بکەن لە هەڵسووکەوتی داگیرکاری دەوڵەتی تورکیە و گۆڕینی دیموگرافیای ناوچەکە.

کۆمەڵەی مافی مرۆڤی کوردستان
پەیوەندی
@KMMKADMIN
تێلگرام
@KMMKKURDISTAN

%d bloggers like this: