کۆمەڵەی مافی مرۆڤی کوردستان: ئەو شەڕ و ئاژاوەی دەوڵەتی تورکیا لەباکووری کوردستان ئەنجامی دەدات ژێنۆسایدێکە رۆژانە و لەپێش چاوی هەموو جیهانیان ئەنجام دەدرێت. تورکیا لەبەر چاوی نەتەوە یەکگرتووەکان، یەکێتی ئەوروپا و کۆمەڵگایی جیهانی گەلی کوردستان کۆمەڵکووژ دەکات و هیچ ناوەند و رێکخراوێکی جیهانی وەک نەتەوە یەکگرتووەکان و یەکێتی ئەوروپا کە دەبا پێداگری لە پاراستنی ژیان و کەرامەتی مرۆڤ کەن، تا ئێستا هەڵوێستی گونجاویان بۆ راوەستانی ئەو کارەساتە ئەنجام نەداوە.
دوابەدوایی کۆتایی هاتنی پرۆسەی ئاشتی لە لایەن دەوڵەتی تورکیا، حکومەتی ئەو وڵاتە دوبارە دەستی دایە کوشتن و قڕکردنی گەلی کوردستان و تا ئێستاکە بە سەدان کەسی سڤیلی کردۆتە قوربانی و بە هەزاران کەسی ئاوارە کردوە، لەنێو قوربانیان دا، رێژەیێکی ئێکجار زۆر مناڵ هەیە و لە هەلسوکەوت لەتەک گیراوان و کەسانێک کە زیندانی کراون، هیچ یاسایەک رێزی لەنەگیراوە و زۆر دژەمرۆڤانە لەتەکیان ڕەفتار کراوە.
جیا لە وێران کردنی ماڵ و شاری کوردستانیان ، دەوڵەتی تورکیا دەستی دایە قەدەخە کردنی ناوەندە مەدەنیە کوردیەکان، بەوەش نەوێستا و سەرۆک شارەوانی و پارڵمانتارانی کوردی باکووری کوردستانی دەسبەسەر کرد و ڕەوانەی زیندانی کردوون، فیگەن یۆکسکداغ، سەلاحەدین دەمیرتاش، گوڵتەن کشاناک، ئەحمەد تورک، لەیلا زانا، لەیلا دەمیرل، سەباحەت تونجەل، عوسمان بایدەمیر، ئیدریس بالوکان و … کەسانی هەرە دیاری ئەو پارچەیەیی کوردستانن، کە کەوتنە بەر هێرش و دەستبەسەر کردن و ئێستاش زۆربەیان لە گرتوخانەدا ماون.
دەوڵەتی تورکیا بەو هێرشانەی دەیەوێت گەلی کوردستان قڕ بکات و پلانە هەرە چەپەڵ و دژە مرۆڤیەکەی کە لەسەرەتایی دامەزرانیەوە دژی گەلی کورد هەبوو بە ئەنجامی بگەیێنێت.
تا ئێستاکە بە سەدان هێرش و کوشتن دژی گەلی کورد پەیڕەو کراوە و بە هەزاران کەس بێ سەرو شوێن کراون.
راپۆرتی نوێی نەتەوە یەکگرتووەکان تەنیا بەشێکی بچوکی ئازارەکانی گەلی کورد لەخۆیی دەگرێت و ئەو زام و ئازارەی گەلی کورد زۆر قووڵتر و سامناکەرە.
ئێمە وەک کۆمەڵەی مافی مرۆڤی کوردستان، وێرایی شەرمەزارکردنی هەڵوێستەکانی دەوڵەتی تورکیا، داوا لە کۆمەڵگایی جیهانی، نەتەوە یەکگرتووەکان، یەکێتی ئەروپا و هەموومرۆڤە ئازادەکان دەکەین، کردەوەکانی حکومەتی تورکیا کە کۆمەڵکووژی گەلێکە، ئەویش لە زەمانی ئێستا کە نەدەبا ئیتر کارەساتی لەو چەشنە دووپات ببێتەوە، شەرمەزار کەن و حکومەتی تورکیا مەجبوور کەن ڕێز لە کەرامەتی مرۆڤەکان بگرێت.
کۆمەڵەی مافی مرۆڤی کوردستان
