kmmk:
ئەمڕۆ یەکشەممە ۲۲ی رەزبەری ۱۳۹۷ی هەتاوی، کاسبکارێکی کورد بە ناسناوی عەلی نەسیری خەڵکی شاری بۆکان بەدەستی هێزی ئینتزامی کۆماری ئیسلامی ئێرانەوە دەدرێتە بەر دەستڕێژ و فیشەکێک بەر سەری دەکەوێت و پاشان دەگەیەندرێتە نەخۆشخانەی شاری مەهاباد.
بە پێی راپۆرتێک لە ماڵپەڕی کۆڵبەر نیوز: ناوبراو بە گومانی هەڵگرتنی باری قاچاخ دراوەتە بەر دەستڕێژ و ئێستە لە بەشی چاوەدێری تایبەت لە نەخۆشخانەی شاری مەهاباد لە کۆمادایە و ئەگەری گیان لەدەست دانی زۆرە.
شارۆمەندانی کورد لە رۆژهەڵاتی کوردستان هیوایان بە گەشەکردن و بوژانەوەی ئابوری لە لایەن کۆماری ئیسلامی ئێرانەوە نەماوە و بە هۆی بێکاری و بۆ دابین کردنی شتومەکە سەرەتایەکانی بژێوی ژیان ملکەجی رووکردن لە پیشەی کۆڵبەری دەبن و لەم رێگایەدا بەرەوڕوی مەترسیگەلێک وەک: شاخ و رێگای سەخت، سەرما، قورسی بار و گۆڕەپانی مینڕێژکراو دەبنەوە و پاش تێپەڕبون لەو مەترسیانە بەدەستی هێزە ئەمنیەتیەکانی کۆماری ئیسلامی ئێران دەدرێنە بەر دەستڕێژ و ساڵانە ژمارەیەکی زۆر لە کۆڵبەران بەو هۆیەوە گیانیان لەدەست دەدەن یاخود بریندار دەکرێن.
کۆمەڵەی مافی مرۆڤی کوردستان
