ک.م.م.ک:
بەپێی ڕاپۆرتەکان، لە ماوەی ٢ تا ٥ی سەرماوەزی ٢٧٢٥ی کوردی، سێ هاووڵاتی لە زیندانەکانی نەھاوەند، ئاڵیگودەرز و ئیلام کە پێشتر بە تۆمەتی قەتڵ بە ئێعدام سزا درابوون، له سێدارە دران.
ناسنامەی ئەو هاووڵاتیانه بریتییە لە موحەمەدعەلی جیهانیان لە نەھاوەند، بەھمەن ساڵحی ـ ٣٠ ساڵە و باوکی یەک منداڵ ـ لە ئاڵیگودەرز، و کامبیز فروخی لە ئیلام.
جیهانیان و فروخی سپێدەی یەکشەمە ٢ی سەرماوەز، له سێدارە دران، و ساڵحی سپێدەی چوارشەمە ٥ی ئەم مانگه. سێ کەسەکە پێشتر بە تۆمەتی کوشتن دەستبەسەر کرابوون و پاشان لە لایەن دادگای رژێمی ئێرانەوە سزای سێدارەیان به سەردا سەپێنرابوو.
تا کاتی داڕشتنی ئەم ڕاپۆرتە، هیچ یەک لەم سێ ئێعدامه لەلایەن بەرپرسانی زیندان یان رێکخراوه فەرمییەکانی حکومەتەوە ڕانەگەیێنراوە.
