KMMK:
ڕێکەوتی شەشی بەفرانباری ۲۷۱۹ کوردی، لە سەر سنوورە دەستکردەکانی کۆماری ئیسلامی لە شاری سەردەشت تاقمێک لە کاسبکاران بوونە ئامانجی هێرشی تەقەی هێزە چەکدارەکانی کۆماری ئیسلامی و بەم هۆیەوە کاسبکارێک گیانی لە دەست دا و کاسبکارێک بە گرانی بریندار کرا.
بە پێی ڕاپۆرتەکە، محەممەد ڕەشیدزادە خەڵکی گوندی قەلەڕەش کوژرا و خدر بێنەوا تەمەن ۲۵ ساڵ، خەڵکی گوندی دەرماناوێ ی سەر بە شاری سەردەشت بریندار کرا.
ئەو دوو کاسبکارە دوای بریندار بوون لە لایان خەڵکەوە بۆ نەخۆشخانەی شاری سەردەشت گواسترانەوە.
محەمەد ڕەشیدزادە بە هۆی قووڵی برینەکانی گیانی لە دەست دەدا و خدر بێنەوا بە هۆی گرانی برینەکانی بۆ نەخۆشخانەی شاری مهاباد گواسترایەوە.
هەروەها پێنج‌شەممە ۵ ی بەفرانبار، ئۆتۆمبێلی کاسبکارێک بە ناوی سەعدی سەفایی خەڵکی دیواندەڕە لە ڕێگای نێوان ئەهواز ئەندیمێشک لە لایان هێزە چەکدارەکانی حکومەتی کۆماری ئیسلامی تەقەی لێ کرا و ئەو کاسبکارە کوژرا.
بە پێی داتاکانی ناوەندی ئاماری ک. م. م. ک ڕێژەی کۆڵبەران و کاسبکارانی کوژراو و بریندار بەم شێوەیە:
کۆڵبەری بریندار: ۱۳۱ کەس
کۆڵبەری کوژراو: ۶۷ کەس
کاسب‌کاری بریندار: ۱۷ کەس
کاسب کاری کوژراو: ۱۶ کەس
کۆمەڵەی ماڤی مرۆڤی کوردستان
