ک.م.م.ک:
بە پێی ئەو ڕاپۆرتەی بە ناوەندی هەواڵی کۆمەڵەی مافی مرۆڤی کوردستان گەیشتووە، ڕۆژی شەممە ١٣ی گەلاوێژی٢٧٢٤، تەها ڕەسووڵیان، هونەرمەندی خەڵکی پیرانشار، بە مەبەستی جێبەجێکردنی حوکمی زیندان، دەستبەسەر و بۆ بەندیخانەی ناوەندیی ئێران لە نەغەدە ڕاگوێزرا. ناوبراو لە شۆڕشی ژینادا دەستبەسەر و لە دوو دۆسیەی جیادا، سزای حەوت ساڵ و دە مانگ-سێ مانگ بەندکرانی بەسەردا سەپێندرا.
ناوبراو پێشتر لە لایەن لقی ١ی دادگای ئینقلابی ڕێژیمی ئێران مەهابادەوە بە کۆی گشتی ٧ ساڵ و ١٠ مانگ زیندانی بە تۆمەتی وەک ئەندامێتی حیزبی دێموکرات و هەوڵی دژ بە ئاسایشی نەتەوەیی مەحکووم کرابوو کە ماوەی ٣ ساڵ و ٧ مانگ لەم حوکمه جێبەجێ دەکرێ.
تەها ڕەسووڵیان لە مانگی گوڵانی ساڵی ٢٧٢٣ی کوردی، لە لایەن لقی ١٠٢ی دادگای دووی تاوانەکانی ئێران له پیرانشار، بە تۆمەتی تێکدانی ئاشتی و ئارامی گشتی بە سێ مانگ زیندان و ٤٠ قامچی سزا درا.
ئەم هونەرمەنده، ڕۆژی چوارشەممە ٢٨ی بەفرانباری ساڵی ٢٧٢٢، لە پیرانشار دەستبەسەر و پاشان بۆ زیندانی ئێران لە نەغەدە گوازرایەوە. لە کۆتاییدا لە دووی مانگی ڕەشەمەی هەمان ساڵ، بە دانانی بارمتە بە شێوەی کاتی ئازاد کرا.
خ.ع
