کۆمەڵێک لە ناوەندە ماف مرۆڤییەکانی کوردستان بە دەرکردنی لێدوانێک ئیدانەی هێرشی چەکداری حکومەتی ئێران بۆ سەر حیزبە کوردستانییەکان دەکەن و داوای کۆتایی ھێنانی ئەو شەڕخوازیەی حکومەتی ئێران دەکەن.
ناوەڕۆکی لێدوانی سێ ڕێکخراوەی ناوەندی مافی مرۆڤ بۆ ڕۆژهەڵاتی کوردستان، ڕێکخراوی مافی مرۆڤی هانا و کۆمەڵەی مافی مرۆڤی کوردستان بە شێوەی خوارەوەی:
هەروەک ئاگادارن لە ماوەی ڕۆژانی ڕابردوو (٩،١٠ و ١١ ی سێپتامبری ٢٠٢١) دڕۆنە بۆمب ڕێژکراو و تۆپخانەکانی سپای پاسدارانی ئینقلابی ئیسلامی، بە چڕی ناوچە سنوورییەکانیی باشووری کوردستان لەوانە «سیدەکان، بەربزین، چۆمان و بەرزاییەکانی ناوچەی سنووری حاجی ئۆمەران»ی بە بیانووی هەبوونی مەقەڕ و بارەگای حیزبە کوردستانییەکانی دژبەری کۆماری ئیسلامی بۆردمان کرد. لە ئەنجامی ئەم هێرشانەدا زیانی ماڵی و ژینگەیی بە ناوچەکە و خەڵکی نیشتەجێی ئەو سنوورانە گەیاند و بوو بە هۆی ترس و دڵەڕاوکێی زۆر.
ئەم هێرشانە لە کاتێکدا ڕوو دەدەن کە لە ماوەی ڕۆژانی ڕابردوو «محەممەد پاکپوور» فەرماندەی هێزی زەوینی سپای پاسداران هەڕەشەی لە حیزبە سیاسییەکانی کوردستان و خەڵکی دانیشتووی دەوروپشتی بارەگاکانی ئەوان کرد، ئەگەرچی ئەمە جاری یەکەم نییە کە کۆماری ئیسلامی ئێران هێرش دەکاتە سەر چالاکانی سیاسی و ئوپوزیسیۆنی ئەو حکوومەتە و هەڕەشەیان لێ دەکات. ناوەندە ئەمنی و نیزامییەکانی کۆماری ئیسلامی ئێران ماوەماوە بە بیانووی هەبوونی حیزبە کوردستانییەکان، هێرش دەکەنە سەر ناوچە سنوورییەکانی هەرێمی کوردستان و ئەم هێرشانە زیانی گیانی و ماڵی لە ڕادەبەدەری لێدەکەوێتەوە.
هەر بۆیە، ئێمە ڕێکخراوەکانی چالاک لە بواری مافی مرۆڤ لە کوردستان، هێرشی سەربازی و چەکداری بۆ سەر حیزبەکانی کوردستان و هەروەها بێدەنگی ڕێکخراوە نێونەتەوەییەکان و کۆمەڵگای جیهانی لە بەرامبەر ئەم جۆرە کردەوانەدا بە تووندی مەحکووم دەکەین و وێڕای کۆمەڵانی خەڵکی کوردستان خوازیاری کۆتایی هێنان بە هێرشەکانی کۆماری ئیسلامی ئێران بۆ سەر چالاکانی سیاسی و حیزبەکانی ڕۆژهەڵاتی کوردستانین. هەروەها لەو بڕوایە داین کە چارەسەری پرسی کورد لە ڕێگای تیرۆر، ئیعدام، دەستبەسەرکردن، هێرشی نیزامی و هەڕەشەکردن چارەسەر نابێت و دانپێدانان بە خواستی نەتەوەی کورد و پێدانی مافی ڕەوا، یاسایی و سرووشتی کورد و چارەسەری ئاشتیانەی پرسیی کورد تەنیا ڕێگایەکە کە ئاشتی و سەقامگیری لە ناوچەکە درووست دەکات.
ناوەندی مافی مرۆڤ بۆ ڕۆژهەڵاتی کوردستان
ڕێکخراوی مافی مرۆڤی هانا
کۆمەڵەی مافی مرۆڤی کوردستان
١٢ی سێپتەمبەری ٢٠٢١
