KMMK:
ڕۆژی سێ شەممەی حەوتووی ڕابردوو، ٢۶ی خاکەلێوەی ٢٧٢٠ی کوردی، هێزەکانی ئیدارەی ئیتلاعاتی حکوومەتی کۆماری ئیسلامی ئێران لە گەڕەکی ” تەرخان ئاوا”ی ئەو شاره گەنجێکی تەمەن ٣٢ ساڵیان بە ناونیشانی “ئیسماعیل ئەردەوانی” دەستبەسەر کردووە.
بە گوێرەی هەواڵەکە لە سەرچاوەیەکی متمانە پێکراوەوە: ئەم هاوڵاتییە بە تۆمەتی هاریکاری یەکێک لە حیزبە کوردییە دژبەرەکانی حکوومەتی ئێران دەستبەسەر و ڕاگواستراوە بۆ گرووخانەی گشتی ئیتلاعاتی حکوومەت لە شاری سنە.
شیاوی باسە: پاش تێپەڕینی دە ڕۆژ بەسەر دەستبەسەری نابراودا تا ئێستە هیچ زانیارییەک لە سەر چارەنووسی ئیسماعیل ئەردەوانی دەست نەکەوتووە و هەموو هەوڵەکانی بنەماڵەکەی بێ ئەنجام ماوەتەوە.
بە پێی داتاکانی ناوەندی ئاماری کۆمەڵەی مافی مرۆڤی کوردستان: لە سەرەتای ساڵی نوێی زاینییەوە تا ئێستە بەم کەسەوە ٣۵ هاوڵاتیی کورد لە لایەن هێزە ئەمنییەکانی حکوومەتی ئێرانەوە لە ڕۆژهەڵاتی کوردستان دەستبەسەر کراون.
کۆمەڵەی مافی مرۆڤی کوردستان
