کەمپێنی هەڵوێستی بەکارنەهێنانی مادە تەقینەوەیەکان لە نەورۆز

بە نزیک بوونەوەی سەری ساڵی نوێ و هاتنی بەهار چالاکانی کوردی رۆژهەڵاتی کوردستان، کەمپینێکیان بۆ بەکارنەهێنانی مادە تەقینەویەکانی وەک تەرەقە ڕاگەیاندوە و هەوڵ دەدەن گەنجان لە رۆژهەڵاتی کوردستان، ئەو مادە مەترسیدارانە بۆ جەشنەکانیان بەکار نەهێنن.

بە پێی ئەو هەواڵانەی لە رۆژهەڵاتی کوردستان گەیشتونەتە دەست کۆمەڵەی مافی مرۆڤی کوردستان، چالاکانی مەدەنی و خەڵکی شاری رەبەت لە رۆژهەڵاتی کوردستان کەمپینێکیان بە ناوی “نا بۆ بە کارهێنانی مادە تەقینەویەکان” ڕاگەیاندوە و هەوڵ دەدەن بۆ مەراسمەکانی نەورۆز خەڵک و گەنجان مادەی وەک تەرەقە کە مەترسی بۆ سەر سڵامەتی خەڵک ساز دەکات، بەکار نەهێنن، هاوکات داوایان لە خەڵک کردوە کە بۆ ساز کردنی ئاگرەکانی نەورۆز، شتگەڵێ وەک تایێری تڕۆمبێل بەکار نەهێنن، چوون دەبێتە هۆیی پێس بوونی ژینگە و هەوایی کوردستان، هەر ئەوە دەبێتە هۆکاری خەسار دان لە ژینگە و بە چەندین نەخۆشی بۆ خەڵک ساز دەکات.

جێی ئاماژەیە کە هەر ساڵ و بە هاتنی نەورۆز، گەلی کوردستان مەراسم و جەشنگەلێ تایبەت بە هاتنی نورۆز و سەری ساڵی نوێی کوردی دەگرن، نەورۆز مانایێک تایبەتی مێژوویی، کۆمەڵایەتی و سیاسی هەیە و بە واتایی سەرهەڵدان و ژیانەوە لە کلتوور و داب و نەریتی کوردستان دێتە نرخاندان.

هاوکات لە گەڵ کەمپینی نا بۆ بەکار هێنانی مادە تەقینەویەکان لە شاری رەبەت سەر بە شارستانی سەردەشت، لە چەندین شار و ناوچەی تریش لە رۆژهەڵاتی کوردستان، هەۆڵگەلێ بۆ پاراستنی پاکی ژینگە و سڵامەتی خەڵک ڕاگەیاندراوە و چالاک بوون.

کۆمەڵەی مافی مرۆڤی کوردستان